Punëtorët e RTK-së ende pa paga, Sindikata nuk distancohet nga protesta e 6 gushtit

Sindikata e Punëtorëve të RTK-së ka shprehur shqetësimin e thellë që edhe këtë fundmuaj, mediumi publik i vendit mbetet pa financim, duke lënë pa paga mbi 700 punëtorë dhe familjet e tyre.

Sipas Sindikatës, kjo situatë është jashtëzakonisht e rëndë dhe krejtësisht e papranueshme.

“Ne nuk mund të pranojmë që punëtorët e RTK-së, të cilët çdo ditë mbajnë të informuar qytetarët e Republikës së Kosovës, të mbeten pa të ardhura për shkak të neglizhencës institucionale.

Edhe njëherë u bëjmë thirrje të gjitha institucioneve përgjegjëse që të ndërhyjnë urgjentisht për të gjetur një zgjidhje për situatën dhe për të garantuar pagat e punëtorëve tanë” thuhet në reagim.

Madje, Sindikata ka rikujtuar protestën e lajmëruar për 6 gusht, duke thënë se mbetet e pashmangshme kjo formë e të shprehurit.

Me këtë rast, Sindikata ka njoftuar të gjithë punëtorët e RTK-së të jenë të pranishëm dhe të bashkuar në këtë protestë.