Presidentja e Zvicrës: Kosova ka rol të rëndësishëm në sigurinë e Ballkanit, s’duhen vatra të reja të krizave

Presidentja e Konfederatës të Zvicrës, Karin Keller-Sutter, ka thënë se Zvicra është e vetëdijshme që Kosova luan rol të rëndësishëm për sigurinë në Ballkanin Perëndimor.

Ajo tha se siguria në Ballkanin Perëndimor është parakusht për sigurinë në përgjithësi në Evropë, teksa shtoi se duhet kujdesur që të mos ndizen vatra të reja të krizave.

“Ne flasim shpesh për luftën në Ukrainë, por duhet të kujdesemi që vatrat e krizave në vendet e tjera të mos ndizen prapë”.

“Siç e dini, Zvicra është prezente në kuadër të KFOR-it dhe do të mbetet kështu derisa të jetë e nevojshme”, tha Keller-Sutter.

Tutje, ajo tha se Zvicra e ka mbështetur gjithmonë Kosovën në rrugën e saj për anëtarësim në organizata multilaterale.

“Zvicra në përgjithësi e ka mbështetur Kosovën gjithmonë në organizatat multilaterale dhe kisha thënë se edhe gjatë përgatitjes së rrugëtimit në këto organizata, ne bashkëpunimin drejt demokracisë dhe sundimit të drejtësisë i kemi dhënë mbështetje”.

“Më herët thashë që Zvicra mbështet që shtetet e Ballkanit Perëndimor të bëhen pjesë e BE-së. Nuk është çështje e jona, është çështje e politikës së brendshme të këtyre shteteve, mirëpo mendoj që ky zhvillim e mbështet stabilitetin në rajon”, tha ajo.