Për çfarë po konsultohet LVV-ja me partitë tjera?

Nënkryetarja e Lëvizjes Vetëvendosje, Albulena Haxhiu konfirmoi se kanë një takim konsultativ me partitë e tjera parlamentare, ndërsa po futej në Kuvend.

Megjithatë, ajo tha se do ta mbajnë qëndrimin e njëjtë edhe sot.

“Ne vazhdojmë ta mbajmë qëndrimin e njëjtë”, iu tha ajo gazetarëve.

Edhe anëtarë tjerë të LVV-së konfirmuan se s’do të heqin dorë nga Haxhiu si kandidate për kryeparlamentare, pavarësisht se nënkryetari i kësaj partie, Glauk Konjufca tha të hënën se “kjo situatë politike nuk mund të zgjidhet përveçse me një marrëveshje politike”.

LVV-ja e propozoi Albulena Haxhiun për kryetare të Kuvendit të shtunën, por ajo në dy tentativa dështoi të merrte më shumë se 57 vota. Paraprakisht, seanca konstituive e Kuvendit që nisi më 15 prill u ndërpre dy herë për shkak të mosmarrëveshjeve ndërmjet partive lidhur me dorëheqjet e qeveritarëve para betimit si deputetë.

Të shtunën Konjufca kërkoi “kohë shtesë që të mos përsëritet situata e njëjtë”, dhe megjithëse tha se propozimi i tyre s’ka ndryshuar, ai nuk u hodh për votim.

“Meqenëse e kemi pa që të gjitha subjektet politike qysh dje janë prononcuar se do ta kishin qëndrimin e njëjtë edhe në këtë seancë, mendoj që kjo situatë politike nuk mund të zgjidhet përveçse me një marrëveshje politike”, tha ai.