Pasuria milionëshe e Luan Dalipit, këshilltari i Albin Kurtit me Mercedes mbi 30 mijë euro

Tashmë është konfirmuar edhe nga vet Luan Dalipi, këshilltari i kryeministrit Albin Kurti, vëllai i tij, Driton Dalipi ka aplikuar për licensë për furnizim me energji elektrike në vend.

Driton Dalipi me kompaninë MDA, ku Luan Dalipi punonte më herët, është rrugës për t’i hyrë tregut të energjisë elektrike .

Luan Dalipi është përfolur disa herë në media, sidomos për pasurinë e tij e cila kap shifrën milionëshe.

Edhe këtë vit, në Agjencinë për Parandalimin e Korrupsionit, Luan Dalipi ka deklaruar se është pronar i një banese me vlerë 110 mijë euro, një dep 6 mijë euro dhe një garazhe 3 mijë e 200 euro. Veç kësaj, ai ka edhe një shtëpi në pronësi të përbashkët e cila kushton hiç më pak se 950 mijë euro.

Veç kësaj, shefi i kabinetit të Kurtit vozit veturë Mercedes Benz, e cila siç ka deklaruar ai, i ka kushtuar 35 mijë euro.

Dalipi i ka 2 mijë e 600 euro të kursyera në emër të tij në bankë, dhe afër 60 mijë euro në pronësi të bashkëshortes.

Si pagë vjetore, përpos meditjeve, ai ka deklaruar 15 mijë euro nga Zyra e Kryeministrit.