Pasaportat më të fuqishme: e Kosovës bie katër vende më poshtë në renditje

Indeksi i Pasaportave Henley, një nga disa renditje që matin fuqinë e pasaportave, atë të Kosovës e rendit në vendin e 65-ta në botë.

Kosovarët mund të udhëtojnë me të, pa vizë, në 81 vende.

Në renditjen paraprake tremujore, pasaporta kosovare renditej e 61-ta me 82 vende ku mund të udhëtoje me të pa vizë.

Pasporta e Shqipërisë, që paraprakisht renditej e 49-ta, këtë herë është në vendin e 47, me 122 vende në të cilat mund të shkosh me të.

Nga pasaportat e shteteve tjera të rajonit, ajo e Serbisë renditet e 36–ta, e Bosnjes e 47-ta, e Malit të Zi e 43-ta dhe e Maqedonisë së Veriut e 42-ta.

Indeksi i Pasaportave Henley mat fuqinë e pasaportave, dhe për herë të parë në historinë e tij 20-vjeçare, pasaportën amerikane e ka lënë jashtë listës së 10 më të mirave.

Tre pasaporta aziatike mbajnë tani kryesimin e renditjes: Singapori, me hyrje pa vizë në 193 destinacione në mbarë botën; Koreja e Jugut, me hyrje në 190; dhe Japonia, me 189.

Ndërkohë, Shtetet e Bashkuara renditen në vendin e 12-të në renditjen më të fundit tremujore, në të njëjtin nivel me Malajzinë.

Qytetarët e të dy vendeve gëzojnë hyrje pa vizë në 180 nga 227 vendet dhe territoret që ndiqen nga indeksi, i cili u krijua nga firma këshilluese globale për shtetësi dhe qëndrim Henley & Partners, me qendër në Londër, dhe përdor të dhëna ekskluzive nga Shoqata Ndërkombëtare e Transportit Ajror.

Top-lista:

1.Singapori (193 destinacione)

2. Korea e Jugut (190)

3.Japonia (189)

4.Gjermania, Italia, Luxemburgu, Spanja, Zvicra (188)

5.Austria, Belgjika, Danimarka, Finlanda, Franca, Irlanda, Holanda (187)

6.Greqia, Hungaria, Zealanda e Re, Norvegjia, Portugalia, Suedia (186)

7.Australia, Republika Çeke, Malta, Polonia (185)

8.Kroacia, Estonia, Sllovakia, Sllovenia, Emiratet e Bashkuara Arabe, Mbretëria e Bashkuar (184)

9.Kanadaja (183)

10.Letonia, Litenshtajni (182)