Pas sqarimeve nga Presidenca, seanca konstituive vazhdon nesër në ora 12:00

Seanca për konstituimin e kuvendit do të vazhdojë nesër nga ora 12:00.

Kjo është bërë e ditur nga Kuvendi përmes një njoftimi për media.

Sot presidentja e Kosovës, Vjosa Osmani, i ka kthyer përgjigje kryesuesit të seancës, Avni Dehari, pasi ky i fundit i ishte drejtuar me një letër duke i kërkuar sugjerime pasi seanca konstituive e thirrur nga Osmani të martën u ndërpre si pasojë e mosvotimit të raportit të Komisionit për Verifikimin e Mandateve.

PDK, LDK dhe AAK nuk e votuan atë raport me arsyetimin se anëtarët e qeverisë duhet të japin dorëheqje formale para betimit si deputetë.

Akoma pa dhënë një përgjigje presidentja, LDK ka thënë se do të jenë në sallën e kuvendit nesër në ora 10:00. Abdixhiku ka kërkuar sërish dorëheqjen e anëtarëve të qeverisë që kanë fituar mandat të deputetit.

Ndërkaq nënkryetarja e PDK’së, Vlora Çitaku, ka thënë për Express se e kanë “obligim mbi bazën e rregullores së punës” që të jenë nesër në kuvend.

Kur u pyet nëse ende e kanë kusht dhënien formale të dorëheqjeve të anëtarëve të qeverisë, Çitaku tha se “asgjë nuk ka ndryshuar”