Një person arrestohet në Podujevë për organizim të skemave piramidale dhe bixhozit të paligjshëm

Një person është arrestuar mbrëmjen e së dielës rreth orës 21:00 në rrugën “Xhemajl Mustafa” në Podujevë, nën dyshimin për organizim të skemave piramidale.

Sipas njoftimit të Policisë, arrestimi është bërë në kuadër të një aksioni policor, gjatë të cilit është kryer edhe kontrolli i lokacionit.

Me këtë rast, janë gjetur dhe sekuestruar tri shtëpiza kompjuteri, dy monitorë, një skaner si dhe pajisje të tjera që dyshohet se janë përdorur për veprimtari të kundërligjshme.

I dyshuari, F.M. (mashkull), me vendim të prokurorit kompetent është dërguar në mbajtje. Ndërkohë, hetuesit policorë në koordinim me Prokurorin e Shtetit janë duke vazhduar veprimet e nevojshme procedurale për zbardhjen e plotë të rastit.