Nëndega e LDK-së për NRW realizonë një vizitë të veçantë te Familja Rugova

Nëndega e LDK-së për NRW – Gjermani ka pasur kënaqësinë të realizojë një vizitë të veçantë te Familja Rugova. Fillimisht, veprimtarët e Nëndegës, së bashku me bashkatdhetarë nga mërgata dhe nga Kosova, bënë homazhe te varri i Presidentit Historik Ibrahim Rugova. Pas kësaj, ata vazhduan vizitën te Familja Rugova, ku u pritën ngrohtësisht nga Zonja e Parë e Republikës së Kosovës, znj. Fana Rugova, dhe i biri, Ukë Rugova.

Kryetari i Nëndegës, z. Jakup Gërguri, falënderoi përzemërsisht për mikpritjen dhe nënvizoi disa momente të rëndësishme të kësaj ngjarjeje. Ai theksoi se kjo është hera e 17-të që Nëndega ndan Mirënjohjen ‘Ora e Presidentit’ dhe hera e 14-të që takohemi. Përveç këtyre, Nëndega ka realizuar dy nga porositë e Presidentit Historik Ibrahim Rugova: Festimin e Ditës së Presidentit dhe organizimin e Darkës së Lamës. Kësaj radhe, përveç Mirënjohjes ‘Ora e Presidentit’, është vendosur të nderohen edhe dy veprimtarë me Mirënjohje nga Nëndega jonë: z. Mehdi Bardhi, kryetari i parë i Drenasit, dhe z. Musa Jupolli, veprimtar në Zvicër. Z. Gërguri shprehu dëshirën që këto mirënjohje t’i ndajë Zonja e Parë e Kosovës, znj. Fana Rugova.

Në vijim, znj. Fana Rugova falënderoi Nëndegën dhe të pranishmit për vizitën. Ajo vlerësoi lart të gjithë laureatët e deritashëm të Mirënjohjes ‘Ora e Presidentit’ dhe përgëzoi Nëndegën për përzgjedhjen e tyre. Znj. Rugova dorëzoi personalisht mirënjohjet e përmendura. Për z. Mehdi Bardhi, mirënjohjen e pranoi i biri, z. Nazmi Bardhi, i cili shprehu falënderime të sinqerta për këtë nderim. Nga ana tjetër, veprimtari Musa Jupolli evokoi kujtime të ngrohta nga takimet e tij me Presidentin Rugova dhe falënderoi të pranishmit dhe Nëndegën për këtë çmim të veçantë.

Ndër të ftuarit, fjalë rasti mbajti edhe z. Isuf Bajraktari, Kryetar i Degës 2 të LDK-së në Suedi, i cili falënderoi për pritjen dhe vlerësoi punën e Nëndegës dhe angazhimin e mërgatës. E pranishme ishte edhe Kryetarja e Degës 1 për Suedi, znj. Qibrije Hoxha, dhe ish Drejtori i zyrës së LDK-së, z. Selver Doda, i cili u falënderua për angazhimin e tij të palodhur në të gjitha 17 evenimentet, dedikuar Mirënjohjes ‘Ora e Presidentit’.

Në shenjë respekti dhe falënderimi, znj. Fana Rugova iu dhurua një buqetë lulesh nga znj. Gane Thaqi Konjuhi, në emër të Nëndegës.