Mediumi belg: Belgjika dëshiron të krijojë burgje në Kosovë, vendi ballkanik do mbështetje për rrugën drejt BE-së

Për shkak të mungesës së hapësirës në burgjet e vendit, qeveria belge dëshiron që disa të burgosur ta vuajnë dënimin e tyre në Kosovë.

Sipas agjencisë belge të lajmeve Belga, qeveria po shqyrton mundësinë që në vendin ballkanik ta marrë me qira ose ta ndërtojë një burg për personat e dënuar që nuk kanë status të ligjshëm qëndrimi. Kosova ka një marrëveshje të ngjashme me Danimarkën.

Ministrja belge e Drejtësisë, Annelies Verlinden, si edhe ministrja e Azilit dhe Migracionit, Anneleen Van Bossuyt, udhëtuan së fundmi në Kosovë për bisedimet e para, shkruan n-tv, mediumi gjerman në pronësi të RTL.

Mungesa e hapësirës ka sjellë tashmë një ligj të ri

Burgjet e mbipopulluara janë problem në Belgjikë. Për këtë arsye, gjatë verës në këtë vend perëndimor hyri në fuqi një ligj i ri. Sipas tij, gjatë shqyrtimit të vendimeve gjyqësore duhet të jepet një arsyetim i saktë pse një dënim me burg është me të vërtetë i nevojshëm. Aktualisht mungojnë rreth 2.000 vende burgimi.

Në vitin 2014, Belgjika u dënua nga Gjykata Europiane për të Drejtat e Njeriut për kushte të padenja në burgjet e saj dhe që nga atëherë është kritikuar disa herë për këtë arsye, ndër të tjera edhe nga Këshilli i Evropës. Sipas agjencisë belge të lajmeve, përcjell mediumi gjerman, Kosova dëshiron mbështetje nga Belgjika në rrugën e saj drejt Bashkimit Evropian. Deri tani, vendi është vetëm kandidat potencial për anëtarësim.