Mediat amerikane zbulojnë detaje të reja pasi doli autopsia e Burim Havollit

Nuk do të ngrihen akuza për vdekjen e një mbikëqyrësi ndërtese në Brooklyn, i cili u gjet me një dëmtim në kokë pasi burimet policore thanë se ai u konftrontua me një person që kishte hyrë pa leje, i cili mund të kishte vjedhur paketat e banorëve.

Autopsia e Burim Havollit zbuloi se ai vdiq nga një gjendje mjekësore e mëparshme dhe Prokuroria e Qarkut Brooklyn përcaktoi se nuk kishte elementë kriminale të përfshirë, tha NYPD të premten, shkruan CBS, transmeton Gazeta Express.

Një person që po konsiderohej i dyshuar në lidhje me vdekjen e Havollit ishte marrë në pyetje, por më pas u lirua dhe nuk do të përballet me akuza, njoftoi policia.

Një telefonues i 911 raportoi një sulm të mërkurën në mëngjes në 1199 Ocean Ave., në Flatbush, ku punonte Havolli. Ai kishte trauma të konsiderueshme në kokë kur oficerët e gjetën dhe e dërguan me urgjencë në Spitalin e Qarkut Kings, ku vdiq.

Hetuesit shikuan një video të shkurtër në celular që tregonte një person që grindej me Havollin dhe vepronte në mënyrë të çrregullt pak çaste para sulmit të supozuar, por ata nuk e cilësuan vdekjen e tij si vrasje.

Burimet më vonë thanë se mbikëqyrësi 41-vjeçar kishte një bllokim të rëndë të një arterie.

Banorët folën me lavde për Havollin dhe i thanë CBS News New York se vjedhja e pakove është një problem në ndërtesën e tyre.

Vëllai i tij, i pikëlluar thellë, foli për vdekjen e Burimit dhe kujtoi se si të dy i kishin mbijetuar luftës së Kosovës në vitin 1999, para se të largoheshin drejt Shteteve të Bashkuara.

“Ai e donte këtë vend. Ky vend na ndihmoi shumë”, tha Blerim Havolli.

“Nuk ka fjalë që mund ta shpjegojnë. Kjo është e trishtueshme. Ai la pas tre [fëmijë] dhe ishte vetëm 41 vjeç”, tha Petrit Havolli, një kushëri.

Familja tha se planifikojnë që trupin e Havollit ta çojnë në Kosovë për t’u varrosur.