Mbi 144 mijë aplikime të pranuara për subvencionin e teksteve shkollore

Gjashtë ditë pas hapjes së sistemit për aplikim për subvencionimin e teksteve shkollore, përmes platformës e-Kosova janë pranuar gjithsej 144,337 aplikime.

Ministrja në detyrë e Arsimit, Arbërie Nagavci, ka theksuar se deri tash nuk ka pasur ankesa, ndërsa verifikimi i aplikimeve nga koordinatorët e shkollave po zhvillohet në mënyrë të rregullt.

“Brenda gjashtë ditëve të para nga hapja e sistemit për aplikim për subvencionim, përmes platformës e-Kosova, janë pranuar gjithsej 144,337 aplikime. Deri më tani, janë verifikuar 730,064 aplikime, duke treguar angazhim dhe efikasitet të lartë në menaxhimin e procesit. Procesi po zhvillohet pa pengesa, dhe deri tani nuk është pranuar asnjë ankesë nga prindërit, çka dëshmon për funksionalitetin dhe transparencën e sistemit”, ka shkruar ministrja në Facebook.

Subvencionimi i prindërve për blerjen e teksteve shkollore vitin e kaluar i ka kushtuar shtetit rreth 20 milionë euro.