Mbërrin në detin e Kroacisë luftanija më e madhe në botë

Aeroplanmbajtësja amerikane USS Gerald R. Ford, e njohur si anija luftarake më e madhe në botë, është ankoruar të martën në brigjet e Splitit, Kroaci, për një vizitë të planifikuar në port, duke tërhequr turma banorësh dhe turistësh që u mblodhën përgjatë bregdetit të qytetit.

Ambasada e SHBA-së në Zagreb ka thënë se vizita pasqyronte “miqësinë dhe bashkëpunimin e qëndrueshëm” midis SHBA-së dhe Kroacisë.

Ministria e Mbrojtjes e Kroacisë ka theksuar rëndësinë e vizitës duke nënvizuar stabilitetin e mbrojtjes kolektive të NATO-s.

Është vizita e dytë në Split dhe Kroaci nga aeroplanmbajtësja më e përparuar e Marinës Amerikane, pas ndalesës së saj të parë në port në qershor 2023.

Ndërsa është e ankoruar në Split, Gerald R. Ford do të presë zyrtarë vendas dhe udhëheqës kryesorë për një takim, ka njoftuar Marina Amerikane në një deklaratë.

Ford është i pari në klasën e re të aeroplanmbajtësve të përparuar të Marinës, të cilët janë projektuar për të mbajtur një larmi më të gjerë aeroplanësh dhe për të operuar me disa qindra marinarë më pak.