Macron me vizitë zyrtare në Shqipëri, pritet nga Rama në kryeministri

Presidenti i Francës, Emmanuel Macron, ka mbërritur në Shqipëri për një vizitë zyrtare më 17 maj, vetëm një ditë pas pjesëmarrjes në Samitin e Komunitetit Politik Evropian që u zhvillua në Tiranë.

Mëngjesin e kësaj të shtune, ai u prit në ambientet e Kryeministrisë nga kryeministri Edi Rama, ku të dy liderët shtrënguan duart dhe realizuan një fotografi zyrtare përpara konferencës së përbashkët për shtyp.

Kjo shënon vizitën e dytë të Macron në Shqipëri brenda një kohe të shkurtër, por është hera e parë që e shoqëron bashkëshortja e tij, Brigitte Macron.

Në orën 09:30 është paraparë nënshkrimi i një sërë marrëveshjesh bilaterale që përfshijnë fushat e mbrojtjes, turizmit dhe energjisë.

Më pas, rreth orës 10:00-10:15, është planifikuar deklarata e përbashkët për mediat nga dy udhëheqësit.

Agjenda do të vazhdojë me pjesëmarrjen e Ramës dhe Macron në forumin ndërkombëtar “Iniciativa e Investimeve të së Ardhmes”, ku pritet të marrin pjesë edhe figura të njohura ndërkombëtare si Jared Kushner, dhëndri i presidentit amerikan Donald Trump, dhe ish-kryeministri italian Matteo Renzi.