Limaj nga Malisheva godet udhëheqësit e PDK-së: I bëj pykë në Prishtinë, mua s’më zhgënjen vendlindja

Ekrem Kastrati nga Nisma Socialdemokrate e Fatmir Limajt ka fituar edhe një mandat në krye të Malishevës, duke marrë 53,41% të votave, sipas rezultateve preliminare të KQZ-së.

Lideri i partisë së vogël ishte mbrëmë në qytezën në pjesën qendrore të Kosovës, ku foli para një turme qytetarësh që kishin dalë për të festuar.

Limaj tha se është i fuqishëm edhe në Prishtinë, por që në vendlindjen e tij ka shkuar gjithmonë me përulësi. Ai e goditi kundërkandidatin e Kastratit nga PDK-ja, Gëzim Krasniqin – i cili mori 18,91% të votave – duke folur për titullin e tij akademik.

“Unë kurrë s’kam kallxu çfarë shkolle kam të kryer. Unë në Malishevë kam ardhë me përulje kam folë çka kam bë për vendin tim. E dikush ka mendu që pse është doktor duhet me u votu… Unë kurrë s’ju kam thënë njerëzve çfarë titulli kam”, tha ai.

Ish-komandanti i goditi edhe udhëheqësit e Partisë Demokratike të Kosovës, të cilët tha se i bën “pykë” në kryeqytet. Për dallim prej tyre, Limaj tha se ai fiton në vendlindje.

“Djem, kam porosi edhe për shefat e tyre. Ju një gja duhet me e ditë: A e dini pse unë jam i fuqishëm atje në Prishtinë? A e dini pse unë ju bëj pykë atje në Prishtinë? Sepse ju asnjani nuk mundeni me dal që ju ka votuar vendlindja juaj. Mua kurrë s’më ka zhgënjy vendlindja jem”, tha ai.