LDK themelon Nëndegën e re në Dortmund, mbi 50 të rinj i bashkohen vizionit rugovian

Në Nordrhein-Westfalen të Gjermania u themelua Nëndega e dytë e Lidhja Demokratike e Kosovës për Dortmund me rrethinë, duke shënuar një hap të rëndësishëm në konsolidimin dhe zgjerimin e strukturave organizative të partisë në diasporë. Me këtë rast, Dega II e LDK-së në Gjermani pasurohet edhe me një nëndegë të re aktive dhe energjike.

Kuvendi zgjedhor, i mbajtur më 30 nëntor 2025, mblodhi rreth 50 pjesëmarrës, shumica prej tyre të rinj, të cilët shprehën gatishmërinë e tyre për t’u bërë pjesë e angazhimeve politike dhe organizative në kuadër të LDK-së. Punimet e Kuvendit u udhëhoqën nga Këshilli Nismëtar per themelimin e Nëndegës Dortmund,qe e kryesoi z. Refki Ahmeti dhe u zhvilluan në përputhje të plotë me rregulloren e punës për zgjedhjen e komisioneve, kryesisë dhe kryetarit. Kuvendi pati mbështetje dhe përkujdesje të drejtpërdrejtë nga tre përfaqësues të Nëndega e LDK-së për NRW, njëri prej të cilëve i autorizuar nga Dega II për vëzhgim.

Me votë unanime, Kuvendi zgjodhi për kryetar z. Shefqet Daci, si dhe Kryesinë prej 9 anëtarësh, duke krijuar një ekip të ri udhëheqës me vizion dhe përkushtim për të kontribuar në rritjen e rolit të LDK-së në këtë zonë.

Në fjalën e tij, përfaqësuesi i Kryesisë së Degës II dhe Nëndegës NRW, z. Jakup Gërguri, falënderoi të gjithë pjesëmarrësit, kryetarin e zgjedhur dhe Kryesinë e re për angazhimin dhe kontributin e tyre, duke theksuar rëndësinë e bashkërendimit dhe bashkëpunimit të vazhdueshëm mes strukturave të LDK-së në diasporë. Ai po ashtu falënderoi kryetarin Daci për punën dhe kontributin e dhënë deri më tash edhe në kuadër të Nëndegës NRW, duke shprehur vullnetin e tij për partneritet të qëndrueshëm mes dy nëndegëve në të ardhmen.

Kryetari i sapozgjedhur i Nëndegës Dortmund, z. Shefqet Daci, falënderoi delegatët për besimin e dhënë dhe u zotua se do të punojë me përkushtim maksimal, në shërbim të LDK-së, me qëllim arritjen e rezultateve sa më të mira. Ai po ashtu shprehu mirënjohje për përfaqësuesit nga Nëndega NRW dhe deleguarit e Degës II për vëzhgimin dhe mbështetjen e tyre, duke konfirmuar bashkëpunim të vazhdueshëm në frymën e programit dhe vlerave të LDK-së.

Pjesëmarrësit u ndanë nga Kuvendi tejet të kënaqur dhe të motivuar, duke e cilësuar këtë takim si një moment të rëndësishëm, i cili u krijon mundësinë që aktivitetet dhe organizimet politike t’i zhvillojnë tashmë në qytetin e tyre, pa pasur nevojë të udhëtojnë larg.