Kuvendi i Kosovës në udhëkryq: Mbeten edhe tri seanca për konstituim

Ora po godet prapa për përcaktimin përfundimtar nëse legjislatura aktuale e Kuvendit të Kosovës do të konstituohet apo jo. Janë vetëm edhe gjashte ditë dhe tri seanca, që do ta vendosin fatin institucional të vendit.

Afati përfundon të premten, kur Deharit i soset afati ligjor prej 48 orësh për thirrjen e radhës së seancës. Pas kësaj, vendi mund të futet në një zonë të paqartë ligjore dhe kushtetuese, për shkak të mungesës së sqarimit për “çka ndodh nëse nuk zgjedhet Kryetari i Kuvendit”.

VV ka numrat – me ndihmën e PDK-së – për ta zgjedhur Kryetarin e Kuvendit, por kërkon vetëm një zgjidhje: votim të fshehtë për Albulena Haxhiun. Që nga nisja e këtij ngërçi, në seancat e dështuara për më shumë se tre muaj, qëndrimet nuk kanë ndryshuar.

Tashmë Kushtetuesja ka pranuar lëndë të re në lëndën e vjetër, ku i kërkohet gati se të vizatojë se çfarë ka thënë: Partia Demokratike e Kosovës dhe Lidhja Demokratike e Kosovës i janë drejtuar në të njëjtën linjë.

PDK ka kërkuar katër pika të saktësohen deri në paekuivokizëm:

Të shpallet vendimi i Kuvendit për Komisionin për Votim të Fshehtë si jokushtetues.

Të shpallet ndërprerja e seancës si jokushtetuese.

Të urdhërohet vazhdimi i seancës konstituive me votim të hapur, sipas praktikave të mëhershme.

Të konstatohet se dështimi në zgjedhjen e Kryetarit nuk çon automatikisht në zgjedhje të reja.

PDK argumentoi se Aktgjykimi i 26 qershorit 2025 i Gjykatës ndaloi ndryshimin e rendit të ditës të seancës konstituive dhe hodhi poshtë të ashtuquajturin Komision për Votim të Fshehtë.