Kurti tregon pesë vendimet e para që do t’i marrë mandatin e radhës

Albin Kurti po synon një tjetër mandat në krye të qeverisë.

Teksa kanë mbetur edhe 12 ditë nga zgjedhjet e parakohshme të 28 dhjetorit, Kurti ka shpalosur programin qeverisës për mandatin e ardhshëm, shkruan IndeksOnline.

Me këtë rast, ai ka treguar pesë vendimet e para që do t’i marrë si qeveri, nëse fiton zgjedhjet.

Vendimi i parë dhe më i rëndësishmi është ai i miratimit të buxhetit për 2026-tën, në vlerë prej 4 miliardë eurosh – më i madhi deri më tani.

Më pas, Kurti thotë se do të procedojë ligjin e ri për çmime tavan, “në mënyrë që të frenohet abuzimi i tregtarëve”.

Vendimi i tretë ka të bëjë me procedimin e ndryshim-plotësimit të ligjit që heq kufizimin e punësimit për veteranët e UÇK-së, që marrin beneficion.

Me të marrë mandatin e radhës, Kurti premton se do të miratojë vendimin për pagën e 13-të për të gjithë shërbyesit publikë.

Ndërkaq, vendimi i pestë ka të bëjë me pakon për përballje me inflacionin 2.0.

Kjo pako ka vlerë prej 200 milionë eurove, ku do të ofrohet mbështetje të njëhershme për pensionistët, fëmijët që marrin shtesa, studentët dhe punëtorët e sektorit privat, si dhe do të rikthehet skema për subvencionim të kursimit të energjisë elektrike.

Nga kjo e fundit pritet të përfitojnë mbi 200 mijë familje.