Kurti thotë se bashkëpunimi me Kusarin “mbase do të futet në manuale të shkencave politike”

Alternativa, partia e udhëhequr nga Mimoza Kusari-Lila, ka shënuar dje 8-vjetorin e themelimit të saj me një ceremoni të mbajtur në Prishtinë, ku morën pjesë figura të njohura politike nga pushteti.

Në këtë ngjarje, të cilën Alternativa e cilësoi si “madhështore”, të pranishëm ishin edhe kryetari i LVV-së, Albin Kurti, si dhe bashkëkryetari i partisë Guxo, Faton Peci.

Kurti e vlerësoi shumë bashkëpunimin me Alternativën, duke thënë madje se ai “mbase do të futet në manualet e shkencave politike”.

“Ndjehem i nderuar që jam sonte me ju, ku po shënojmë 8 vjet nga themelimi i partisë Alternativa. Tash e 6 vjet Lëvizja VETËVENDOSJE dhe partia Alternativa ecim së bashku në udhën institucionale të Republikës së Kosovës. Alternativës rregullisht i janë rritur votat dhe sivjet krahasuar me para 8 viteve kryetarja, Mimoza ka më shumë se karëfishin e votave”, tha ai.

Ai e quajti Mimoza Kusari-Lilën “shtyllë të rëndësishme” të koordinimit ndërmjet legjislativit dhe ekzekutivit.

“Ky bashkëpunim mbase do të futet në manualet e shkencave politike kur flitet për koalicionet dhe partneritetet. Sonte dua ta falënderoj kryetaren Mimoza Kusari-Lila për punën që ajo nuk e ndali kurrë për forcën e saj që s’ia pamë kufinjtë asnjëherë”, u shpreh Kurti.

Ndërkaq, Faton Peci tha se Alternativa përfaqëson vlera të bashkëpunimit dhe stabilitetit politik.

“Kudo që Alternativa ka pasur përfaqësim unë kam parë përkushtim e angazhim maksimal. Mimoza është shembull pozitiv dhe pikë reference që duhet me u ndjek edhe nga gjeneratat e reja”, tha ai.

Në fund, Kusari-Lila përmbylli ceremoninë duke kujtuar se fillimi i Alternativës ishte një përpjekje për një mendim të ri në politikë, me orientim liberal dhe përfshirje të të rinjve.

“Një e vërtetë vazhdon të na rikonfirmohet, Demokracia dhe shteti i lirë nuk mund të merren për të mirëqena. Ato duhet mirëmbajtur dhe kultivuar me dashuri dhe pasion çdo ditë dhe nga çdo nivel”, u shpreh ajo.