Kurti “pa fjalë” pas refuzimit nga Abdixhiku, sapo i bëhet pyetja largohet nga gazetarët – pamje

Kryeministri në detyrë, Albin Kurti, refuzoi të përgjigjej në pyetjet e gazetarëve për refuzimin e ftesës nga ana e Lidhjes Demokratike të Kosovës për takim konsultativ me të dhe nëse do t’i çonte ftesa partive të tjera.

Kurti pa e thënë asnjë fjalë u largua nga gazetarët.

Kreu i LDK-së, Lumir Abdixhiku, dje përmes një komunikate njoftoi se nuk do të shkojë në takimin e ftuar nga Kurti lidhur me formimin e institucioneve.

“Duket se fjalët e thëna e bindjet e ushqyera në vijimësi, nuk kanë peshë njëjtë për të gjithë. Sepse, pavarësisht të gjithë gjërave të thëna, të bëra e stërbëra, dje kam pranuar një letër nga Kryetari i Lëvizjes Vetëvendosje, z. Kurti, për takim konsultativ mes nesh. Sado që unë dhe LDK nuk udhëhiqemi nga inati; sado që ne besojmë në dialog, bashkëpunim e komunikim njerëzor e politik; një takim i tillë – madje edhe konsultativ – do të ishte kapërcim fatal i dinjitetit njerëzor dhe politik. Mes ‘hajvanatit’, ‘mbytjes së LDK-së’, ‘bashkëpunëtorëve të Serbisë’, mes moçalit të madh të pështymave ndaj nesh – unë, LDK dhe votuesit tanë – nuk e gjejmë veten as për konsultim. Sepse fjalët, si edhe bindjet, kanë peshë”, tha dje Abdixhiku.

Mundësinë e dërgimit të ftesave për partitë tjera përpos LDK-së s’e përjashtoi nënkryetarja e Vetëvendosjes, Albulena Haxhiu.

“Prandaj, deri në seancën konstituive janë edhe shtatë ditë. Natyrisht që nuk e përjashtoj mundësinë që brenda këtyre shtatë ditëve do të ketë veprime tjera, do të ketë përpjekje të tjera për takime tjera. Në këtë rast, kryetari Kurti ka ftuar për takim LDK-në për nesër apo pasnesër. Janë dy ditë në disa orare”, ka thënë dje ajo.