Kurti negocionte për qeverinë e re në pjesën e parë të vitit – çfarë skenarë diskutoheshin dhe sa vota kishte “mbledhur”?

Për të qëndruar në pushtet edhe për një tjetër mandat qeverisës, Albin Kurti kishte nisur publikisht përpjekjen në pjesën e parë të vitit, pak kohë pas zgjedhjeve të 9 shkurtit. Fillimisht ai kishte biseduar me përfaqësuesit e partive politike minoritare, të cilët i kishte pritur në zyrën e kryeministrit.

Kryetari i LVV-së asokohe i kishte siguruar shpejt votat e shumicës së deputetëve nga pakicat joserbe, por tre prej tyre nuk ia kishin premtuar asnjëherë votën.

Kryetarja e Partisë së Re Demokratike boshnjake, Emilija Rexhepi, fillimisht e kishte “konfirmuar gatishmërinë e plotë për vazhdim të bashkëpunimit” me LVV-në.Por, më vonë marrëdhënia e tyre u përkeqësua pasi pushteti filloi ta demonizojë kërkesën e Baljes për formimin e një komunë për boshnjakët, që e kërkonte në këmbim të  votës për qeverinë.

Takimet Kurti i kishte vijuar me ministrin në detyrë për Komunitete dhe Kthim dhe kryetarin e Partisë për Liri, Drejtësi dhe Mbijetesë, Nenad Rashiqi. Edhe ai, sipas njoftimit më vonë “e kishte përsëritur mbështetjen e tij ndaj Kurtit për formimin e qeverisë së re dhe vazhdimit të bashkëpunimit të frytshëm edhe në mandatin e ardhshëm”.

Më pas Kurti e kishte takuar edhe me ministrin në detyrë të Administrimit të Pushtetit Lokal dhe kryetarin e partisë egjiptiane Iniciativa e Re Demokratike e Kosovë, Elbert Krasniqin.

Me të tre këta, tha se do ta vazhdonte partneritetin “edhe në katërvjeçarin e ardhshëm”.

Diskutimet i kishte vazhduar me deputetë, përfaqësues politikë të komunitetit boshnjak, egjiptian, turk, rom, ashkali e goran. E kishte takuar ministrin në detyrë të Zhvillimit Rural, kryetarin e Partisë Demokratike Turke të Kosovës, Fikrim Damkën, kryetarin e Partisë Liberale Egjiptiane, Veton Berishën, përsëri kryetaren e partisë boshnjake Unioni Socialdemokrat, Duda Baljen, kryetarin e Partisë së Romëve të Bashkuar të Kosovës, Albert Kinollin, kryetarin e Koalicionit Vakat, Rasim Demirin, kryetarin e Partisë Unike Gorane, Adem Hoxha, kryetarin e Partisë së Ashkalinjëve për Integrim, Etem Arifin e deputetin e zgjedhur nga ky subjekt, Artan Asllanin.

Pas takimeve me ta, Kurti kishte shkruar në Facebook se “përgjegjësia na takon neve” për formimin e qeverisë, ndërsa përmendte përfshirjen, pjesëmarrjen, angazhimin e kontributin thelbësor të komuniteteve joshumicë. Diskutimet me ta, i kishte përshkrusr si “të hapura”.

Por deputeti egjiptian, Veton Berisha, deputetja boshnjake Duda Balje dhe ai i komunitetit goran, Adem Hoxha nuk ia kishin premtuar votat e tyre. Ata kishin kërkesa specifike për Kurtin të cilat nuk kishin marrë aprovim.

Kurti kishte parë se përpjekja nuk ishte e lehtë, ndërsa dy ditë pasi i përfundoi takimet e para me përfaqësues të pakicave evidentoi se Serbia “po ndërhyn te disa prej deputetëve të komuniteteve joshumicë e joserbë, që ta sabotojë themelimin e institucioneve të reja të legjislaturës së nëntë” dhe e thirri një mbledhje të Këshillit të Sigurisë.

Fatmir Limaj ishte i pari të cilin kryetari i LVV-së e takoi menjëherë pas diskutimeve me përfaqësuesit e pakicave. Më pas Kurti i dërgoi kryetarit të LDK-së, Lumir Abdixhiku ftesa për bashkëqeverisje, por u refuzua prerazi.

Para pak ditësh në Londër, Kurti zbuloi që Limajt ia kishte ofruar postin e nënkryetarit të Kuvendit dhe dy poste qeveritare. Kreu i NISMA’s e kishte kërkuar pozitën e Kryeparlamentarit.

LVV-ja, e cila i ka 48 deputetë në grupin parlamentar, do t’i bënte 51 vota me tre deputetët e Nismës. Për shumicën në Kuvend (61 nga 120). Por, Kurtit nuk do t’i mjaftonte vetëm kjo marrëveshje dhe madje as votat e 8 deputetëve minoritarë të cilat llogariten të sigurta. Pa Berishën, Baljen e Hoxhën, LVV edhe po t’i kishte të sigurta votat e Nismës nuk do t’i bënte më shumë se 59 vota në Kuvend.

Mbetet të shihet se si do të sillen sot deputetët dhe a do të dalë Kurti ta formojë Kurti 3 pa marrëveshje – një qeveri të ashtuquajtur të minorancës, të shumëpërfolur kohëve të fundit.