Ish-këshilltari i Kurtit anëtarësohet në PDK, kundër koalicionit me VV-në

Më pak se një muaj para zgjedhjeve të parakohshme parlamentare, qytetarët e Kosovës janë të gatshëm të japin fjalën e tyre për përfaqësuesit e ardhshëm të vendit, duke shpresuar që të mos përsëritet ngërqi politik që karakterizoi vitin që po lëmë pas.

Ndërkohë, skena politike po lëviz me hyrje të reja në partitë e ndryshme, ndër to edhe ish-këshilltari i kryeministrit Albin Kurti, Durim Berisha, i cili është anëtarësuar në Partinë Demokratike të Kosovës (PDK).

Duke pasur parasysh dallimet e tij të mëparshme me këtë parti, ky veprim mund të duket i papritur. Megjithatë, Berisha ka shpjeguar arsyet e këtij vendimi, duke theksuar se PDK ka përjetuar një seri humbjesh që nga viti 2014 dhe se dikush duhet të mbajë përgjegjësi për këto dështime.

Në një postim në Facebook, Berisha ka deklaruar se PDK-ja nuk duhet të përsërisë gabimet e kaluara dhe nuk duhet të bëjë koalicion me Albin Kurtin. Sipas tij, lëvizjet e pasuksesshme për të “aderuar” njerëz të padobishëm për partinë, që nuk sjellin asnjë votë të re, janë një barrierë për ndryshim.

“Miq të dashur, më lejoni t’ju njoftoj se, si anëtar i ri i PDK-së, në zgjedhjet që po vijnë – nuk e përkah asnjërin nga kandidatët e saj.

Ne duhet ta kuptojmë se kemi humbur në seri që nga viti 2014. Njerëz brenda PDK-së mbajnë përgjegjësinë për këto dështime serike, por edhe për dështimin për t’i ofruar qytetarit atë që i patëm premtuar para se t’i fitonim zgjedhjet në vitin 2007. Ata duhet të kuptojnë se janë humbësit dhe fajtorët. Thjeshtë, qytetari nuk i don. Përsëritja e të njëjtave gabime – aderime “spektakolare” të njerëzve të padobishëm, që nuk sjellin asnjë votë të re – nuk sjell ndryshim”, ka shkruar Berisha.

Ai ka bërë me dije se kjo parti nuk duhet të bëj koalicion me Albin Kurtin. “Kalkuluesit e humbjes së radhës – me shpresën se Albin Kurti do të tregohet i mëshirshëm dhe do t’i pranojë në koalicion – qëndrojnë në PDK vetëm për përfitime personale. Për asnjë qëllim tjetër.”, u shpreh ai.