Humbet 11-vjeçari me autizëm në Viti – gjendet pas disa orësh

Një ngjarje alarmante është raportuar gjatë orëve të para të mëngjesit të sotëm në fshatin Smirë të Vitisë, ku një fëmijë 11-vjeçar me autizëm ishte shpallur i zhdukur.

Burimet e Gazetës Sinjali brenda Prokurorisë bëjnë me dije se prindi i tij, I. A., ka njoftuar policinë rreth orës 02:45 se djali i tij, E.A., 11-vjeçar, kishte dalë nga shtëpia në drejtim të panjohur.

Menjëherë pas raportimit, njësitet policore në koordinim me banorët e fshatit kanë filluar kërkimet intensive në zonë, mirëpo pa rezultat për disa orë.

Fatmirësisht, rreth orës 07:55, fëmija është gjetur nga një fqinje afër një procke pranë shtëpisë dhe është dërguar për kontroll në emergjencën e Vitisë.

Sipas raportit mjekësor nga QKMF, fëmija nuk kishte shenja dhune përveç disa gërvishtjeve të lehta.

Për rastin është njoftuar Prokurori i Krimeve të Rënda, i cili ka autorizuar hapjen e rastit “Person i humbur”. Pas gjetjes së fëmijës, me urdhër të tij rasti është mbyllur me raport të veçantë.