Hap i madh, Prishtina merr konfirmim zyrtar për fazën e radhës të Lojërave Mesdhetare

Kryeqyteti i Kosovës sot ka marrë sot një konfirmim të rëndësishëm në rrugën drejt organizimit të Lojërave Mesdhetare 2030.

Në Asamblenë e Jashtëzakonshme të ICMG-së u miratua prezantimi i propozimit dhe vazhdimi i përgatitjeve, duke shënuar një hap të madh për Prishtinën dhe mbarë Kosovën.

Lajmi u bë i ditur nga kryetari i Prishtinës, Përparim Rama, i cili u shpreh se qyteti po ecën me siguri drejt 2030-ës me vizion të qartë,

“Lojërat Mesdhetare nuk janë vetëm sport: janë zhvillim urban, infrastrukturë moderne, mundësi për të rinjtë dhe një dritare e hapur për ta prezantuar Prishtinën në botë. Falënderim i veçantë për Komitetin Olimpik të Kosovës, Administratën e Kryeqytetit dhe Qeverinë e Kosovës për përkushtimin dhe partneritetin në këtë rrugëtim”.

Ai njëherësh ka falënderuar Qeverinë shqiptare dhe Komitetin Olimpik të Shqipërisë.

“Po ashtu, faleminderit Qeverisë së Shqipërisë dhe Komitetit Olimpik të Shqipërisë që na kanë mundësuar qasjen në det, një bashkëpunim që e pasuron këtë projekt dhe e bën më të fortë dimensionin mesdhetar të Lojërave.”

Së bashku gjithmonë mund të bëjmë më shumë dhe më mirë. Puna e madhe sapo ka nisur dhe ne do ta bëjmë bashkë. ”