E zhdukën për ta trafikuar – 15-vjeçarja abuzohet seksualisht në ‘Villa TINI’ në Malishevë

Një rast tronditës trafikimi me njerëz dhe shfrytëzimi seksual të një të miture ka dalë në dritë pasditen e 23 korrikut në Villa TINI në Malishevë, ku dy persona dyshohen se kanë keqpërdorur një vajzë vetëm 15-vjeçare, e cila më herët ishte raportuar si person i zhdukur.

Sipas burimeve të Sinjalit, viktima S.A., rreth 15-vjeçare është identifikuar dhe intervistuar më 25 korrik 2025, ku në deklaratën e saj ka dhënë detaje dhe elemente që përputhen me veprën penale “Trafikim me njerëz”.

Njësia për Hetimin e Trafikimit me Qenie Njerëzore – NJHTQNJ-Prizren, pas hetimeve intensive, ka lokalizuar vendin ku është zhvilluar aktiviteti kriminal dhe ka mbledhur prova që e lidhin viktimën dhe dy të dyshuarit me lokacionin në fjalë.

Të dyshuarit: B. Z., rreth 20-vjeçar, nën dyshimin për “Trafikim me njerëz”, dhe L. B., rreth 33-vjeçar, nën dyshimin për “Shërbime seksuale me viktimën e trafikimit”, janë intervistuar në prani të avokatëve mbrojtës dhe me vendim të prokurorit kujdestar, janë ndaluar për 48 orë në Qendrën e Ndalimit.

Hetimet për këtë rast të ndjeshëm janë duke vazhduar, ndërsa Prokuroria ka paralajmëruar veprime të mëtejshme penale për zbardhjen e rrjetit të mundshëm të përfshirë në trafikim dhe shfrytëzim të të miturve.