E rëndë: Ky është 34-vjeçari që vdiq në vendin e punës pasi ra nga skelet në Prizren

Një ngjarje e rëndë ka ndodhur sot rreth orës 13:30 në lagjen “Bajram Curri” në Prizren, ku një punëtor ka humbur jetën pasi ka rënë nga skeletet e një ndërtese në ndërtim.

Viktima është identifikuar si Faik Mehmetaj, 34-vjeçar nga fshati Caravik i Malishevës.

Ai, sipas Policisë së Prizrenit, fillimisht është dërguar në Emergjencën e Spitalit Rajonal të Prizrenit në gjendje të rëndë, por më pas, rreth orës 16:30, është raportuar se ka ndërruar jetë në QKUK – Prishtinë.

Lidhur me rastin, N.B., pronar i kompanisë ndërtimore, është ndaluar për 48 orë me vendim të Prokurorit të Shtetit, nën dyshimin për veprën penale “Asgjësimi, dëmtimi apo heqja e pajisjeve dhe rrezikimi në vendin e punës”.

Policia e Kosovës njofton se, në bashkëpunim me Prokurorin e Shtetit, Inspektoratin e Punës dhe njësitë hetimore kompetente, po zhvillon të gjitha veprimet e nevojshme për të sqaruar plotësisht rrethanat e rastit.