“E ndalëm importin nga Serbia”, Ajvazi: Rrena më e madhe që po i servohet këtij vendi

Sipas ekspertit financiar Kushtrim Ajvazit, pretendimi se “ne e kemi ndalur importin e energjisë nga Serbia” është plotësisht i pavërtetë dhe “rrena më e madhe që vazhdon t’i servohet këtij vendi”.

Ai sqaroi se tregu rajonal i energjisë funksionon përmes bursave si HUPX, ku KESCO, si furnizues i vetëm universal në Kosovë, e ka blerë energjinë nga tregtarë të mëdhenj rajonalë si EFT, GEN-I e të tjerë, e jo drejtpërdrejt nga Serbia si shtet.

Megjithatë, për shkak të linjës funksionale dhe kostos më të ulët të transportit, një pjesë e kësaj energjie ka hyrë fizikisht në Kosovë përmes Serbisë. Sipas Ajvazit, importi direkt nga Serbia është ndalur jo nga Qeveria e Kosovës, por nga vet Serbia, në dhjetor 2020, pikërisht në momentin kur KOSTT u pavarësua si operator i transmetimit dhe u pranua nga ENTSO-E, si pjesë e marrëveshjeve të dialogut të vitit 2015. Pas kësaj, Serbia ka bllokuar kapacitetet ndërkufitare, ka ndaluar kalimin fizik të energjisë drejt Kosovës dhe e ka përdorur rrjetin si mjet presioni politik.

“Çka ndryshoi?

Prej momentit kur KOSTT u pavarësua në dhjetor 2020, Serbia:

• bllokoi kapacitetet ndërkufitare,

• ndaloi kalimin fizik të energjisë drejt Kosovës,

• dhe e përdori rrjetin si mjet presioni politik.

Nuk është ndalur importi – është ndalur vetëm hyrja DIREKTE nga Serbia.

Furnizuesit janë të njëjtët.

Rryma është e njëjta.

Tregu është i njëjti.

I vetmi ndryshim është rruga dhe kostoja.

Çka ndodhi me çmimin?

Nga momenti që Serbia e mbylli kufirin energjetik, çdo import për Kosovën:

• u detyrua të kalojë përmes një kufiri shtesë (Shqipëri, Maqedoni e Veriut, Mal i Zi),

• që do të thotë transport më i gjatë,

• kosto më të lartë,

• dhe çmime më të shtrenjta në fund.

Kostoja shtesë përshkak të transportit më të gjatë e përllogaritur në nivel vjetor është së paku 20milion euro. Në 5 vite, së paku 100 milion euro shtesë.

Ky është realiteti – pjesa tjetër është propagandë.

Prandaj të dalësh sot e të thuash “ne e ndalëm importin nga Serbia” është:

RRENA më e madhe që vazhdon t’i servohet këtij vendi.

Importin direkt e ka ndalë vet Serbia.

Ne vetëm kemi paguar më shtrenjtë për të njëjtën energji.”