Dhunë e rëndë në Fushë Kosovë: 25-vjeçari rrëmben dhe rreh ish-bashkëshorten e mitur

Një rast tronditës i dhunës në familje është raportuar mbrëmë në Fushë Kosovë, ku një vajzë e mitur është rrëmbyer dhe dhunuar nga ish-bashkëshorti i saj, mëson ekskluzivisht Gazeta Sinjali.

Burimet e Sinjalit bëjnë me dije se rasti ka ndodhur më 21 shtator 2025, rreth orës 22:30, në rrugën “Bedri Pejani”, ku i dyshuari E.B rreth 25-vjeçar ka detyruar me dhunë ish-bashkëshorten e tij, A. M. rreth 17-vjeçare, së bashku me një dëshmitare, të hyjnë në veturën e tij. Ai më pas i ka dërguar në fshatin Zllashë, pa dëshirën e tyre.

Sipas deklaratës së viktimës, gjatë rrugës, i dyshuari e kishte goditur disa herë me grusht në fytyrë. Pas lokalizimit të veturës nga policia në fshatin Zllashë, aty janë gjetur vetëm viktima dhe dëshmitarja, ndërsa i dyshuari ishte larguar në drejtim të panjohur.

Viktima është intervistuar nga njësia e Hetimeve në prani të një punëtori të QPS-së, ndërsa asaj i është ofruar edhe ndihmë mjekësore.

Me urdhër të prokurorit kujdestar për rastet e dhunës në familje, rasti është iniciuar si “Dhuna në familje” dhe hetimet po vazhdojnë.