Basha e lajmëron për së dyti konstituimin e Kuvendit, kësaj here pas zgjedhjes së Rashiq

Kreu i Kuvendit të Kosovës, Dimal Basha, ka dalë me një njoftim në profilin e tij për zgjedhjen e deputetit Nenad Rashiq si nënkryetar i Kuvendit të Kosovës nga radhët e komunitetit serb. Basha ka thënë se me këtë vendim, kuvendi i Kosovës është konstituuar plotësisht.

Basha ka shkruar se tashmë Kuvendi ka përbërje të plotë dhe ka falënderuar deputetët e Kuvendit që mundësuan procesin e finalizimit të konstituimit.

Dimal Basha e kishte konsideruar të konstituuar Kuvendin e Kosovës edhe javë më parë kur dështoi të zgjidhet nënkryetari i pestë dhe kur nuk u votua as Nenad Rashiq.

Megjithatë vendimi i Gjykatës Kushtetuese kishte konstatuar se Kuvendi s’ishte konstituuar dhe si rrjedhojë është mbajtur edhe seanca e sotme konstituive.