Banorët e Grazhdanikut 5 ditë në errësirë – sot protestë dhe bllokim rrugësh

Banorët e fshatit Grazhdanik po përballen me një situatë alarmante, pasi prej ditës së enjte kanë mbetur pa furnizim me energji elektrike.

Shkak i kësaj gjendjeje është bërë dëmtimi i rrjetit elektrik nga një qytetar, Agim Osmanaj, i cili, sipas informatave, ka ndërmarrë këtë veprim në shenjë pakënaqësie ndaj mosveprimit të KEDS-it për largimin e tensionit të lartë në zonën ku jeton. Për më tepër, burime lokale bëjnë të ditur se rreziku ka qenë i madh, pasi shtëpia e tij ka rrezikuar të marrë flakë.

Megjithatë, edhe pas disa ditësh, KEDS nuk ka ndërmarrë asnjë veprim për të sanuar problemin, duke e lënë gjithë fshatin në terr total dhe pa një zgjidhje të menjëhershme.

Përballë kësaj situate të rëndë, banorët kishin paralajmëruar protestë për sot (20.08.2025), nga ora 09:00, në udhëkryqin pranë kishës në Grazhdanik. Ata kanë bërë të ditur se gjatë protestës do të bllokojnë rrugët që lidhin Grazhdanikun me Nashecin, Atmagjën, Kobajn dhe fshatrat përreth, deri në momentin kur institucionet përgjegjëse të marrin masa konkrete.

Banorët kërkojnë ndërhyrje urgjente për rikthimin e energjisë elektrike si dhe adresimin e rrezikut nga tensioni i lartë, i cili sipas tyre, jo vetëm që ua ka bërë jetën të padurueshme, por edhe paraqet rrezik serioz për shëndetin dhe sigurinë e tyre.