Banka Botërore ka parashikuar se rritja ekonomike e Kosovës pritet të arrijë në 3,8% gjatë viteve 2025 dhe 2026. Ky rritje do të mbështetet kryesisht nga konsumi dhe aktiviteti investues, por pasiguria ekonomike, veçanërisht ajo e lidhur me politikën e tregtisë globale, është rritur muajt e fundit.

Në Raportin e Rregullt Ekonomik të Bankës Botërore për Ballkanin Perëndimor, të publikuar sot, thuhet se vonesat në formimin e një qeverie të re mund të kenë ndikim negativ në investime dhe në zbatimin e agjendës për reformat strukturore. Gjithashtu, një ngadalësim i mundshëm i aktivitetit ekonomik në Bashkimin Evropian dhe rritja e pasigurisë tregtare mund të kenë një efekt negativ në rritjen e përgjithshme ekonomike të Kosovës.

“Ekonomia e Kosovës vazhdoi performancën e saj të fortë, por Kosova duhet të gjenerojë burime shtesë për nevojat e saj në rritje për investime, duke përfshirë në fushat e energjisë, infrastrukturës, kapitalit njerëzor dhe lidhshmërisë,” tha Massimiliano Paolucci, menaxher i Bankës Botërore për Kosovën dhe Maqedoninë e Veriut.

Raporti gjithashtu thekson se përparimi i mëtejshëm në uljen e varfërisë do të varet nga aftësia për të rritur konkurrueshmërinë e sektorit privat dhe për të mbajtur ritme më të larta të rritjes ekonomike në të ardhmen.

“Një treg më i shtrënguar i punës mund të ndihmojë në rritjen e pagave, ndërsa politikat për të rritur cilësinë e arsimit dhe aftësitë e punëtorëve me arsim më të ulët mund të ofrojnë një nxitje shtesë. Rënia e popullsisë, pjesërisht për shkak të emigrimit, mund të kompensohet me rritjen e pjesëmarrjes së femrave në fuqinë punëtore, aktualisht e kufizuar nga faktorë të tillë si mungesa e shërbimeve të kujdesit për fëmijët. Zgjerimi i shërbimeve të kujdesit për fëmijët do të përmirësonte mundësitë për gratë në tregun e punës dhe do të rriste gatishmërinë e fëmijëve për shkollë përmes edukimit më të mirë në fëmijërinë e hershme, duke krijuar gjithashtu mundësi shtesë për punë,” thuhet në raport.