Asnjë gjurmë për serbin që iku nga burgu në veri

Kanë kaluar më shumë se tri javë nga arratisja e Gjorgj Radomiroviq, i dënuar me 14 vjet e 6 muaj burgim për vrasje, tentativë vrasjeje, posedim të armëve dhe narkotikëve, si edhe falsifikim dokumentesh, por ende nuk ka asnjë gjurmë për vendndodhjen e tij.

Radomiroviq u arratis më 7 gusht nga Qendra e Paraburgimit në Mitrovicën e Veriut, ndërsa ndodhej në hapësirat e punëtorisë së burgut, i kategorizuar si i avancuar dhe pjesë e listës për lirimin e mundshëm me kusht. Në kohën e arratisjes, nga dënimi i tij i plotë kishin mbetur vetëm 3 vjet e 7 muaj, shkruan IndeksOnline.

Pas arratisjes, Shërbimi Korrektues i Kosovës ka pezulluar nga detyra drejtorin e Qendrës së Paraburgimit në Mitrovicë, një mbikëqyrës të lartë dhe dy zyrtarë korrektues, ndërsa hetimet e brendshme janë ende në zhvillim.

Për kapjen e të arratisurit janë angazhuar njësitë e specializuara të policisë, përfshirë Njësinë me qen (K9). Deri tani, kërkimi nuk ka dhënë rezultate konkrete.

Policia e Kosovës u ka bërë thirrje qytetarëve që nëse hasin në personin në fjalë, të njoftojnë menjëherë në numrin 192 ose në stacionin më të afërt policor