Arrestohet Igor Popoviq, mbajti fjalim kundër UÇK-së në Rahovec

Ndihmësdrejtori i të ashtuquajturës Zyrë për Kosovën në Qeverinë e Serbisë, Igor Popoviq, është arrestuar të premten nga Policia në pikën kufitare në Bërnjak pasi gjatë ditës kishte mbajtur fjalim kundër Ushtrisë Çlirimtare të Kosovës në Rahovec, raporton Radiotelevizioni Publik (RTK) me konfirmim nga Ministria e Punëve të Brendshme.

Popoviq gjatë ditës kishte përdorur gjuhë të ashpër kundër UÇK-së, duke e cilësuar si organizatë terroriste dhe duke krahasuar veprimet e saj me ato çka po ndodhin në Gazë.

Gjithashtu, në këtë deklaratë ai ka akuzuar institucionet ndërkombëtare për “dështim në drejtësi”, duke pretenduar se “autorët e krimeve ndaj serbëve nuk janë ndëshkuar asnjëherë”.

KOHA ka kontaktuar me Policinë për të mësuar detaje të tjera nga ky arrestim. Posa të ketë përgjigje, artikulli do të përditësohet.