Arabia Saudite për organizimin e haxhit: Përgjegjësia i takon BIK-ut

Ministri i Ministrisë së Haxhit dhe Umres së Arabisë Saudite, Teufik bin Feuzan bin Rebiah, i ka dërguar një letër kryetarit të Bashkësisë Islame të Kosovës, Myftiut Naim ef. Tërnava, duke informuar besimtarët myslimanë të Kosovës për rregullat e reja të organizimit të haxhit.

Nëpërmjet kësaj letre, ai ka theksuar se organizimi i udhëtimit të haxhit i takon vetëm Bashkësisë Islame të Kosovës si institucioni zyrtar për këtë qëllim.

Bashkësia Islame e Kosovës ka shpërndarë këtë informacion përmes një postimi në faqen e saj zyrtare në Facebook, ku theksohet se Këshilli i Lartë i Dijetarëve të Mbretërisë së Arabisë Saudite ka nxjerrë një fetva të re, duke ndaluar kryerjen e haxhit pa lejen e institucioneve të autorizuara.

Në letër gjithashtu është njoftuar se çdo tentativë për të kryer haxhin pa leje do të sjellë pasoja të rënda, duke përfshirë gjoba dhe ndalim të hyrjes në Mbretërinë e Arabisë Saudite për një periudhë të pacaktuar.