Anulohet vendimi për paraburgim për pesë policët e përfshirë në rastin Zejnullahu

Gjykata e Apelit e Kosovës ka anuluar vendimin e Gjykatës Themelore në Prishtinë, Dega në Lipjan, për caktimin e paraburgimit ndaj pesë policëve të përfshirë në rastin e vdekjes së Agon Zejnullahut.

Përmes një njoftimi, Apeli ka bërë të ditur se janë aprovuar ankesat e mbrojtësve të të pandehurve I.N., A.R., A.K., L.Rr. dhe E.B., dhe se rasti është kthyer në rigjykim.

“Gjykata e Apelit e Kosovës – Departamenti i Përgjithshëm, ka aprovuar ankesat e mbrojtësve së të pandehurve […] si dhe sipas detyrës zyrtare ka anuluar aktvendimin e Gjykatës Themelore në Prishtinë, Dega në Lipjan, duke e kthyer çështjen në rigjykim”, thuhet në vendimin e Apelit.

Gjykata Themelore më herët kishte caktuar masën e paraburgimit prej një muaji për pesë zyrtarët policorë, nën dyshimin se kishin kryer veprën penale “vrasje nga pakujdesia”, gjatë arrestimit të 27-vjeçarit Agon Zejnullahu në Lipjan.

Megjithatë, Apeli ka vlerësuar se vendimi i shkallës së parë kishte mangësi serioze procedurale.

“Kolegji gjykues ka konstatuar se aktvendimi i ankimuar përmban shkelje të dispozitave të procedurës penale të cilat kushtëzojnë anulimin e tij.”, thuhet tutje në vendim

Në arsyetimin e saj, Gjykata e Apelit thekson se mungonte “analiza dhe vlerësimi i provave relevante, të besueshme dhe me fuqi provuese për të konstatuar dhe për të vërtetuar se ekziston dyshimi i bazuar se të pandehurit kanë kryer veprën penale për të cilën pretendohet”.

Gjykatës së shkallës së parë i është propozuar që në rigjykim të eliminojë të gjitha shkeljet e konstatuara.

Pesë zyrtarët policorë u arrestuan si të dyshuar për shkaktimin e vdekjes së Zejnullahut gjatë ndërhyrjes policore.