Albulena Haxhiu dështon sërish të zgjidhet kryetare e Kuvendit, seanca konstituive ndërpritet

Albulena Haxhiu sërish ka dështuar të zgjidhet kryetare e Kuvendit të Kosovës, ndërsa kryesuesi i seancës konstituive, Avni Dehari e ndërpreu atë pas votimit.

57 deputetë votuan për, 46 ishin kundër, ndërsa tre abstenuan.

“Në bazë të rezultateve të votimit, nuk kalon kandidatja për kryetare dhe seanca ndërpritet”, tha kryesuesi Dehari.

Ai tha se seanca konstituive do të vazhdojë të premten në orën 10:00.

Të hënën seanca konstituive u ndërpre pasi nënkryetari i LVV-së, Glauk Konufca tha se nuk kanë hequr dorë nga propozimi i Albulena Haxhiut për kryetare të Kuvendit, dhe ai nuk u hodh për votim, pasi kryesuesit të seancës, Avni Dehari iu kërkua “kohë shtesë që të mos përsëritet situata e njëjtë”.

Konjufca tha se “kjo situatë politike nuk mund të zgjidhet përveçse me një marrëveshje politike”, ndërsa një takim konsultativ i partive politike u mbajt sot paraprakisht.

“Ne vazhdojmë ta mbajmë qëndrimin e njëjtë”, iu tha Albulena Haxhiu gazetarëve para takimit.

LVV-ja e propozoi atë për kryetare të Kuvendit të shtunën, por në dy tentativa dështoi të merrte më shumë se 57 vota. Paraprakisht, seanca konstituive e Kuvendit që nisi më 15 prill u ndërpre dy herë për shkak të mosmarrëveshjeve ndërmjet partive lidhur me dorëheqjet e qeveritarëve para betimit si deputetë.