Abdixhiku: Thelbi i problemit ka qenë te shumica parlamentar

Kryetari i Lidhjes Demokratike të Kosovës Lumir Abdixhiku pas dështimit të seancës konstituive, ka deklaruar se tashmë është e qartë se thelbi i problemit ka qenë te shumica parlamentare, përkatësisht mungesa e kësaj shumice.

Abdixhiku deklaroi se pa numra, pa shumicë s’mund të ketë as kryetar të kuvendit e as qeveri, prandaj problem siç ka qenë gjithmonë, ka qenë politik.

“Siç u pa përveç se kishim humbur plot 48 seanca rresht për shkak të shkeljes kushtetuese tanimë të konfirmuar dyherë me vendim, aktgjykim të Gjykatës Kushtetuese, ne kemi në thelb të problemit mungesën e shumicës politike.

Pra nuk ka numra partia që ka dalë e para në këto zgjedhje. Refuzon të bëjë kompromis me partitë e tjera që kanë ofruar alternativë dhe rrjedhimisht bën bllokadë institucionale në këtë drejtim”, deklaroi Abdixhiku në dalje të Kuvendit të Kosovës.