Tha se koha e ka shkelur udhëheqjen e SBASHK’ut, Jasharaj i përgjigjet Kurtit

Kryeministri në detyrë, Albin Kurti ka kritikuar mbrëmë në një intervistë kreun e SBASHK-ut, Rrahman Jasharaj duke thënë, se ka mbi 20 vjet në krye të sindikatës dhe se koha e ka tejkaluar udhëheqjen aktuale.

Sipas Kurtit, ndër vite kanë ndryshuar sistemi arsimor, prindërit, nxënësit dhe mësimdhënësit, derisa SBASHK-u ka mbetur pa reforma në udhëheqje.

Kreu i SBASHK-ut, Rrahman Jasharaj i është kundërpërgjigjur deklaratave të kryeministrit Kurti duke e akuzuar Qeverinë për qasje të gabuar dhe armiqësore ndaj sindikatës së arsimit.

Jasharaj tha për “Front Online” se pretendimet e Kurtit se “koha e ka shkelur” nuk qëndrojnë.

“Qeveria Kurti dhe vetë Kurti kanë pas qasje të gabuar dhe armiqësore ndaj SBASHK-ut, deklarimet e tij se koha më ka shkelur nuk qëndron se unë në këtë post nuk kam ardhur vetvetiu, por i votuar nga pjesa dërmuese  e punëtorëve të arsimit. Kurti e tregoj edhe njëherë luftën që e ka pasur ndaj Sindikatës”, deklaroi Jasharaj.

Ai shtoi se inati i Kurtit ndaj tij është bërë personale, pasi sipas Jasharajt, kryeministri ka pritur që ai të ndryshojë qëndrimet e SBASHK-ut.

“Kjo çështja e Kurtit është personale me mua sepse ai ka pritur që unë t’i ndryshoj qëndrimet dhe do t’ua kthej qëndrimet që i ka anëtarësia unë do të veprojë sipas zërit të tyre gjithë, i ka mbet syri te SBASHK-u se ka kujtuar që do të nënshtrohemi ndaj tij”, u shpreh Jasharaj.