KQZ e kryen punën e vet, PZAP i pret 48 orë partitë për ankesa, pas kësaj shpallen rezultatet përfundimtare

Tashmë ka përfunduar numërimi i të gjitha votave nga zgjedhjet parlamentare të 28 dhjetorit. Kësisoj, edhe certifikimi i rezultateve përfundimtare pritet të bëhet së shpejti, vendim i cili edhe i hap rrugë krijimit të institucioneve të reja të vendit.

Vetë Komisioni Qendror i Zgjedhjeve, nga ‘’ana teknike’’ është i gatshëm të shpallë rezultatet përfundimtare.

Kështu ka thënë zëdhënësi i KQZ’së, Valmir Elezi. Megjithatë, Elezi, për Gazetën Express, ka theksuar se sipas Ligjit për Zgjedhjet e Përgjithshme, palët kanë të drejtë të parashtrojnë ankesa në PZAP lidhur me administrimin e numërimit në QNR brenda 48 orëve nga ndodhja e shkeljes së supozuar.

‘‘Të premten, në ora 02:00, në Qendrën e Numërimit dhe Rezultateve është përmbyllur numërimi i pjesës së fundit të fletëvotimeve nga votimi me postë, jashtë Kosovës. Numërimi i këtyre fletëvotimeve shënon përfundimin e procesit të numërimit të të gjitha fletëvotimeve nga zgjedhjet e parakohshme për Kuvendin e Republikës së Kosovës, të mbajtura më 28 dhjetor 2025. Përfundimi i krejt këtij procesi vjen vetëm 12 ditë pas ditës së zgjedhjeve, përbën një kohë shumë të shpejtë dhe efikase të përmbylljes së procesit të numërimit. Me përfundimin e numërimit të këtyre fletëvotimeve, nga ana teknike KQZ është e gatshme për shpalljen e rezultateve përfundimtare të zgjedhjeve të parakohshme të mbajtura më 28 dhjetor. Megjithatë, sipas Ligjit për Zgjedhjet e Përgjithshme, palët kanë të drejtë të parashtrojnë ankesa në PZAP lidhur me administrimin e numërimit në QNR brenda 48 orëve nga ndodhja e shkeljes së supozuar’’, ka thënë Elezi.

Ndryshe, nga zgjedhjet e 28 dhjetorit, Lëvizja Vetëvendosje ka dal e para me 51.11%, ose 486,994 Vota. Pas saj radhitët Partia Demokratike e Kosovës, me 20.19% ose 192,407 Vota, e treta Lidhja Demokratike e Kosovës me 13.23% ose 126,102 Vota, dhe e katërta, është Aleanca për Ardhmërinë e Kosovës me 5.50% ose 52,370 Vota.

Nga ky rezultat, VV’ja merr 57 ulëse, PDK 22, LDK 15 dhe AAK merr 6.