Numërimi i votave në fazën finale, kaq kuti të mbetura

Në Qendrën e Numërimit të Rezultateve ka përparuar ndjeshëm procesi i numërimit të votave me postë. Deri më tani janë numëruar 67 nga gjithsej 92 kuti, që përfaqëson 72.83 për qind të totalit të votave me postë.

Sipas rezultateve preliminare të publikuara nga Komisioni Qendror i Zgjedhjeve (KQZ), në këtë fazë të numërimit kryeson Lëvizja Vetëvendosje me 72.56 për qind të votave. Pas saj renditet Lidhja Demokratike e Kosovës (LDK) me 10.62 për qind, ndërsa Partia Demokratike e Kosovës (PDK) ka siguruar 8.19 për qind. Aleanca për Ardhmërinë e Kosovës (AAK) ka marrë 4.73 për qind të votave të numëruara deri tani.

KQZ ka bërë të ditur se procesi ka nisur të shtunën, më 3 janar, në orën 16:00, dhe se ritmi i numërimit është rritur dukshëm. Vetëm brenda 24 orëve të fundit, numri i kutive të përfunduara ka kaluar nga 41 në 67, ndërsa kanë mbetur edhe 25 kuti pa u numëruar.

Fletëvotimet e përfshira në këtë fazë të numërimit u përkasin komunave: Deçan, Gjakovë, Gllogoc, Gjilan, Dragash, Istog, Kaçanik, Klinë, Fushë Kosovë, Kamenicë, Mitrovicë e Jugut, Lipjan dhe Rahovec.

Ndërkohë, KQZ po përditëson vazhdimisht të dhënat në platformën e saj elektronike, ku publiku mund të ndjekë në kohë reale ecurinë e rezultateve.

Procesi i numërimit të votave me postë po vazhdon, ndërsa të gjitha rezultatet mbeten preliminare deri në përfundimin e plotë të numërimit dhe certifikimin zyrtar nga KQZ.