Osmani në Mitrovicë për ta uruar Pecin: Flet për sovranitet në veri, e për investime të shumta

Presidentja e Kosovës, Vjosa Osmani, e ka vizituar kryetarin e Mitrovicës, Faton Peci.

Nga atje, Osmani foli për sovranitet në veri, e për investime të shumta.

“Faleminderit kryetar, e urime për marrjen e kësaj detyre. Jam besimplotë që do ia dilni ju dhe ekipi juaj i jashtëzakonshëm, në mënyrë që për Mitrovicën të sillni më shumë perspektivë e projekte, shpresë. Ne me Fatonin njihemi që një kohë të gjatë, kemi shku në shkollë bashkë, jemi rri në Mitrovicë, i njohim për së afërmi problemet që ballafaqohet ky qytet. Ato janë të shumta. Por besoj se ato do të rregullohen. Qytetarët e Mitrovicës meritojnë çdo të mirë, përkundër sfidave të iu hapet rruga e perspektivës. Gjeneratat e reja presin perspektivë. Duke e njohur punën e tij, dhe seriozitetin me të cilin e merr secilën punë, edhe në aspektin politik, do të bashkëpunojmë sa më shumë që të jetë e mundur, në mënyrë që ta ruajmë sovranitetin e Kosovës, integritetin territorial, këto toka kanë qenë të shqiptarëve, e trashëgimia ilire është dëshmi më e madhe e kësaj”, tha ajo.

Edhe Faton Peci u shpreh i lumtur me vizitën e Osmanit.

“Në ditën e parë të fillimit të punës, ta kemi mysafire presidenten Vjosa Osmani, i uruam mirëseardhje në shtëpinë e saj. Diskutuam për të gjitha nevojat e shqetësimet e qytetarëve të Mitrovicës. Nevojën më të madhe të mbështetjes institucionalet që i duhet Mitrovicës nga Presidentja e Qeveria, nga ana e nivelit komunal kemi ambicie më të madhe t’i adresojmë si çështje. Tash Mitrovica e ka vëmendjen e të parës së vendit, dhe qeverisë në detyrë e kryeministrit Albin Kurti. Kemi diskutuar për të gjitha temat me interes publik për qytetin, prej çështjeve ambientale e deri te arkeologjike”, tha Peci.