Osmani: Kosova i bashkohet koalicionit global për të Ardhmen të Melania Trumpit

Presidentja e Kosovës, Vjosa Osmani dhe Zotëriu i Parë, Prindon Sadriu e kanë bërë të ditur zyrtarisht vendimin për t’u bashkuar me koalicionin global të Zonjës së Parë të Amerikës, MelaniaTrump.

Ky koalicion mban emrin “Ndërtimi i së Ardhmes së Bashku” dhe ka të bëjë me mbrojtjen dhe fuqizimin e fëmijëve dhe të rinjve.

Përmes një letre zyrtare drejtuar Shtëpisë së Bardhë, Kosova ka konfirmuar pjesëmarrjen dhe gatishmërinë e saj për të kontribuar në mënyrë domethënëse në këtë nismë të rëndësishme ndërkombëtare.

“Si një vend që u ngrit nga hiri i luftës dhe përparoi drejt lirisë, paqes dhe demokracisë me mbështetjen dhe udhëheqjen e jashtëzakonshme të Shteteve të Bashkuara, Kosova e kupton rëndësinë e mbrojtjes së fëmijëve dhe krijimit të një mjedisi ku ata mund të rriten dhe të lulëzojnë në paqe.

Prandaj, kjo iniciativë rezonon thellë, duke reflektuar një lidhje të thellë morale me përpjekjet e Zonjës së Parë Melania Trump për të mbrojtur fëmijët, për të mbështetur dinjitetin e tyre, për të investuar në arsimimin e tyre dhe për të ndërtuar një të ardhme të bazuar në siguri, mundësi dhe vlera të forta familjare.

Përvoja e Kosovës nënvizon besimin tonë të fortë se investimi në fëmijë dhe familje të forta është investimi më i fuqishëm në paqe, siguri dhe të ardhmen. Me popullsinë më të re në Evropë dhe një sektor dinamik të teknologjisë, Kosova është e gatshme të kontribuojë me ekspertizë, inovacion dhe partneritet të palëkundur në këtë kauzë globale.

Republika e Kosovës është krenare që qëndron përkrah Presidentit Donald Trump, Zonjës së Parë Melania Trump dhe të gjitha kombeve të përkushtuara për të siguruar që çdo fëmijë të rritet i sigurt, i fuqizuar dhe i lirë, sepse e ardhmja që ndërtojmë për fëmijët tanë është e ardhmja që do të na përcaktojë të gjithëve”, thuhet ndër të tjera në deklaratë.