Së fundmi, njerëzit po përdorin alternativa të ndryshme, përfshirë edhe ato natyrale, për zbardhimin e dhëmbëve.

“Times of India” ka renditur disa mënyra natyrale për të arritur këtë efekt.

Larja me sodë bikarbonat konsiderohet një metodë efektive, pasi kjo sodë përmban veti natyrale zbardhuese dhe përdoret nga brendet e ndryshme dentare si përbërës i pastave të dhëmbëve.

Sipas një studimi të publikuar në gazetën American Dental Association, pastat e dhëmbëve që përmbajnë më shumë sodë bikarbonat janë më efektive për heqjen e njollave në sipërfaqen e dhëmbëve.

Pastrimi me vaj është një metodë e vjetër për të larguar bakteret nga goja. Disa studime kanë treguar se shpëlarja e gojës me vaj të kokosit ndihmon në zbardhjen e dhëmbëve, pasi ky vaj përmban acid laurik, i cili ka veti antimikrobiale. Shpëlarja e gojës me vaj kokosi për 15 deri në 20 minuta mund të jetë efektive në zbardhjen e dhëmbëve.

Ngrënia e frutave dhe perimeve të forta si mollët, karotat dhe trangujt mund të ndihmojë në zbardhjen natyrale të dhëmbëve duke hequr njollat. Këto ushqime stimulojnë prodhimin e pështymës, e cila neutralizon acidet në gojë dhe forcon dhëmbët.

Sipas një studimi të publikuar në gazetën Natural Science, Biology and Medicine, tekstura e mollës dhe e karotave mund të ndihmojë në largimin e njollave në dhëmbë.

Uthulla e mollës gjithashtu ka veti zbardhuese dhe mund të përdoret për pastrimin e dhëmbëve. Shpëlarja e gojës me uthull molle ndihmon largimin e njollave, por duhet përdorur me kujdes për të parandaluar dëmtimin e dhëmbëve.

Për përdorim, uthulla e mollës duhet të përzihet me ujë, pastaj goja të pastrohet për disa minuta dhe në fund të shpëlahet sërish me ujë për të mbrojtur zmaltin e dhëmbëve.

Pastrimi i dhëmbëve me lëvore portokalli gjithashtu ndihmon në largimin e njollave, pasi lëvorja përmban d-limonene, një pastrues natyral. Vitamina C në lëvoren e portokallit gjithashtu ndihmon mishrat e dhëmbëve duke parandaluar inflamacionin.