Ambasada gjermane i reagon Serbisë: Para se ta qortosh Kosovën, së pari pastroni para derës suaj

Ambasada Gjermane në Kosovë ka reaguar ndaj letrës së fundit të Petar Petkoviq, drejtuar Bashkimit Evropian dhe shteteve anëtare, ku ai i kërkon ndalimin e asaj që e quan “veprime eskaluese të Prishtinës”, duke përfshirë ndërtimin e dy urave shtesë mbi lumin Ibër në Mitrovicë.

Në një deklaratë për media, Ambasada e Gjermanisë ka theksuar se Qeveria e Kosovës duhet të heqë dorë nga veprimet eskaluese, por gjithashtu ka theksuar se thirrjet për de-eskalim duhet të jenë të barabarta për të gjitha palët.

“Ashtu siç e kemi deklaruar vazhdimisht, i bëjmë thirrje Qeverisë së Kosovës të heqë dorë nga veprimet eskaluese. Megjithatë, thirrjet për de-eskalim duhet të zbatohen në mënyrë të barabartë për të gjitha palët,”, thuhet në deklaratë.

Ambasada ka ngritur shqetësime lidhur me dështimin e ndjekjes ligjore të autorëve të sulmit të Banjska, duke përmendur Radoiçiq, ish-nënkryetarin e Listës Serbe, i cili sipas deklaratës, ka pranuar publikisht përgjegjësinë për sulmin, por vazhdon të lëvizë lirshëm në territorin serb.

“Sigurisht që nuk është Qeveria e Kosovës ajo që po dështon të zbatojë masa ligjore kundër atyre që janë përgjegjës për sulmin e tmerrshëm në Banjskë. Fakti që udhëheqësi i vetëshpallur i atij sulmi, z. Radoiçiq, pranoi publikisht përgjegjësinë dhe megjithatë vazhdon të lëvizë lirshëm në territorin serb, minon thellësisht përpjekjet për të nxitur besimin dhe llogaridhënien në rajon,”, thuhet në deklaratën e Ambasadës gjermane.

Për të theksuar rëndësinë e trajtimit të çështjeve të brendshme para se të kritikohen të tjerët, Ambasada ka cituar një proverb gjerman: “Në gjermanisht themi, ‘Erstmal vor der eigenen Haustür kehren’ – së pari pastro para derës tënde. Kjo fjalë e urtë na kujton se duhet të rregullosh shtëpinë tënde përpara se ta qortosh vazhdimisht Kosovën për vendimet e saj.”.

Në fund, Ambasada thekson se mosveprimi ndaj dhunuesve është po aq i dëmshëm sa edhe veprimet e pa koordinuara nga Prishtina, duke shtuar se është e rëndësishme që të ketë llogaridhënie dhe zbatim të ligjit për të gjithë.