Tentativa e 23-të për konstituimin e Kuvendit

Deputetët e Kosovës sot do të bëjnë përpjekjen e radhës për konstituimin e Kuvendit.

Kjo do të jetë hera e 23-të që ata do të provojnë përfundimi i seancës konstituive, e cila ka filluar më 15 prill.

Në vazhdimi i seancës që pritet të fillojë në ora 11:00, nuk pritet të ketë ndonjë ndryshim nga përpjekjet paraprake.

Kjo pasi partitë politike deri me tani nuk kanë treguar se kanë ndryshuar pozicionet e tyre.

Kryesuesi i seancës konstituive, Avni Dehari pritet sërish që të tentojë të imponojë votimin për formimin e një komisioni për zgjedhjen e kryetarit të Kuvendit me votë të fshehtë.

Kjo mënyrë e votimit po kundërshtohet nga PDK, LDK dhe AAK.

Meqenëse VV-ja as për këtë komision nuk po arrin t`i marrë votat e nevojshme, pas dështimit të votimit, kryesuesi po e mbyll seancën.

Një veprim i tillë po kritikohet nga partitë e deridjeshme opozitare, duke thënë se kryesuesi po e shkel skenarin e përgatitur nga sekretaria e Kuvendit.

VV-ja ka bërë me dije që nuk tërhiqet nga propozimi i saj që deputetja Albulena Haxhiu të jetë kandidate për kryetare të Kuvendit.

Derisa VV-ja po insiston në zgjedhjen e Albulena Haxhiut kryetare e Kuvendit, partia e Kurtit i ka shtuar edhe përpjekjet për t`i kontrabanduar në mënyrë individuale deputetët e partive tjera.

Këtë po e bënë duke i joshuar ata me pozita ekzekutive dhe favore tjera.

Një gjë të tillë dje e ka konfirmuar edhe deputeti i LDK-së, Anton Quni.

Në emisionin DPT të Fidani, ai ka bërë me dije se në këmbim të votës për kryeparlamentar dhe qeveri i është ofruar postin e Ministrit të Mbrojtjes.

“Kërkohet nga një qytetar i Kosovës në Britani të Madhe, nëpërmjet një bashkëluftëtari tim, një njeri shumë i afërt me mua që ta ketë një bashkëbisedim pa e specifikuar temën, cila është arsyeja. E pyes cila është fusha, profesioni e interesimi. Por më tha komandant nuk e di, e njoh i besoj dhe thjesht ka kërkuar të takohet, i ka ndihmuar Kosovës, është qytetar i ndershëm, është afarist. Me të vërtetë pranova, në takimin e parë më krijoi një pozitivitet”, ka thënë ai, duke dhënë detaje tjera.

“Jo vetëm në bazë të përshkrimit edhe paraqitjes së tij dhe kultura e komunikimit, ishte në nivel. Gjatë bisedës qenka që të përafrohemi LDK dhe LVV, e dëgjova deri në momentin kur thotë se Z. Kurti ka shumë vlerësim të lartë për ty, edhe e ke të sigurt postin e ministrit të Mbrojtjes, aty nuk jam ndjerë mirë, mundem të them se jam ndjerë edhe i ofenduar”, ka thënë Quni.

Qasje e VV-në është kritikuar edhe nga deputetja e PDK-së, Ganimete Musliu.

Ajo ka vlerësuar se Kuvendi i Kosovës është shndërruar në një skenë teatri.

Në profilin e saj në “Facebook”, Musliu ka shkrua se Kosova është në kurthin e Albin Kurtit.

“Kuvendi i Kosovës është shndërruar në një skenë teatri. Rolet janë të ndara: PDK, LDK, AAK me konferenca për shtyp në njërën anë; Vetëvendosje, Alternativa dhe Guxo, si duartrokitës të verbër të liderit suprem, në anën tjetër. Nuk ka më debat të vërtetë politik. Ka vetëm monolog. Në vend të transparencës dhe vendimmarrjes, kemi improvizim. Në vend të përgjegjësisë, kemi tallje me besimin e qytetarëve. Në vend të dialogut, kemi arrogancë dhe përçarje. Kosova po humbet kohë”, ka shkruar ajo, duke shtuar se Kosova ka mbetur peng e Albin Kurtit.

“Ajo ka mbetur peng i një lideri partiak që refuzon të bashkëpunojë, të dëgjojë dhe të ndryshojë. Një lider që e quan veten “shpëtimtar”, dhe të gjithë të tjerët “pengues”. Kosova nuk ka nevojë për një tribun të vetëshpallur. Kosova ka nevojë për politikanë largpamës, konstruktiv dhe bashkpunues, por mbi të gjitha Kosova ka nevojë për politikanë që toprioritet e kanë shtetin e jo egon dhe xhepin e vet. As si politikbërës, as si qytetarë, nuk duhet të rrimë duarkryq përballë një njeriu që po shkatërron çdo mundësi për zhvillim, paqe dhe integrim. Të zgjohemi dhe ta nxjerrim Kosovën nga KURTHI I KURTHIT. Sepse nuk është futur në kurth vetëm Kuvendi , është futur në kurth e ardhmja e Kosovës. Aktivizmi qytetar nuk matet me votë njëherë në katër vjet. As vetëm me konferenca për shtyp njëherë në javë. Matet me zë, qëndrim, veprim dhe reagim të vazhdueshëm. Nëse nuk veprojmë sot ,nesër do të jetë vonë!”, ka shkruar Musliu.