[responsive-menu menu="logged-in-menu"]

Veseli takon personalitete të shumta në Vjenë, dhe ndër ta edhe ish-kandidatin për president të Izraelit, flasin për njohjen



”Kryetari i Kuvendit të Republikës së Kosovës, Kadri Veseli, gjatë qëndrimit të tij në Vjenë, ka takuar personalitete të larta të vendeve të ndryshme, me të cilët ka diskutuar për zhvillimet e fundit politike në Kosovë”, thuhet në komunikatë për media, transmeton Botapress.info

 

”Veseli, në kuadër të konferencës ndërkombëtare të “Com-sult”, në të cilën është trajtuar e ardhmja e vendeve të Ballkanit Perëndimor, po ashtu, ka theksuar nevojën e mbështetjes në rrugën e zhvillimit të integrimeve euroatlantike”.

”Me Nobelistin e njohur Dan Shechman, i cili ka qenë Kandidat për President të Izraelit, Kryeparlamentari Veseli ka folur për mundësitë e avancimit të raporteve mes dy vendeve dhe për njohjen e pavarësisë së Kosovës nga Izraeli”.

”Në një takim me Gregor Gysi, deputet në Bundestagun gjerman, i cili ishte kryetar i së majtës gjermane, ndërkaq, ka diskutuar për mbështetjen e Gjermanisë për Kosovën”.

”Veseli, gjithashtu, ka zhvilluar takime edhe me Jan Zielonga, Shef i Departamentit për Integrime Evropiane në Oxford, Erhard Busek, ish-Zëvendëskancelar i Austrisë, Vaclav Klaus, ish-President i Çekisë, Stefan Sofianski, ish-Kryeministër i Bullgarisë dhe me Martin Meyer, ish-Zëvendëskryeministër i Lihtejnshtajnit, me të cilët ka shtruar çështjen e bashkëpunimeve ndërshtetërore dhe nevojën e thellimit të shkëmbimeve tregtare, kulturore e arsimore”, vazhdon komunikata.

”Kreu i legjislativit kosovar ka pasur një takim të posaçëm edhe me Thomas Muhlman, udhëheqës i Departamentit për Ballkanin Perëndimor në Ministrinë e Punëve të Jashtme të Austrisë, me të cilin ka biseduar për sfidat në vendet e Ballkanit Perëndimor dhe për nevojën që Bashkimi Evropian të vazhdojë zgjerimin me hapa më të shpejtë”.

”Gjatë pjesëmarrjes në panelet e diskutimit në konferencën e “Com-sult”, Kryeparlamentari Veseli ka takuar edhe ish Komisionerin Evropian për Punësim dhe Çështje Sociale, Laszlo Andor, ish-Ministren e Mbrojtjes të Malit të Zi, Milica Pejanovic-Djurisic, si dhe Pishtar Lutfiun, Ministër i Edukimit dhe Arsimit në Maqedoni”, përfundon komunikata për media nga zyra e Kuvendit, përcjell Botapress.info.