Radio Televizioni i Kosovës prej sot është bërë me drejtor të ri. Ai është Rilind Gërvalla, i angazhuar në RTK për 15 vjet rresht por i njohur edhe si eksponent i Vetëvendosjes apo thjesht “i fotografuar” në ndeja e takime me aktivistë e zyrtarë të Vetëvendosjes.
Por Bordi i RTK-së në krye me Besnik Boletinin dhe “shokë” të tij në këtë Bord, e kanë zgjedhur Rilind Gërvallën në pozitën e Drejtorit të RTK-së me 8 vota pro dhe asnjë kundër.
Rilind Gërvalla i ka kundërshtuar reagimet ndaj zgjedhjes së tij në pozitën e drejtorit të RTK-së, por partitë politike të opozitës e kanë konsideruar këtë zgjedhje si kapje të mediumit publik nga partia në pushtet.
Por RTK edhe më parë, apo pothuaja prej fillimit ka qenë e kapur dhe e çkapur prej partive politike shqiptare të Kosovës.
Kështu më vitin 2016, Vetëvendosje përmes një komunikate për opinion RTK-në nuk e konsideronte radioteleviziont të Kosovës, por në radiotelevizion të klanit “Pronto”.
“…ky klan kriminal, përmes menaxhmentit të RTK-së, e ka shndërruar këtë medium në propagandues mbrojtës të aferave të tyre. Në anën tjetër RTK po përdoret nga PDK e LDK për të etiketuar, shpifur e sulmuar mediatikisht kundërshtarët e politikë të pushtetit” thuhet ndër të tjerash në një komunikatë të Vetëvendosjes të datës 22 gusht të vitit 2016.
Por duket se edhe Vetëvendosjes i ERDHI DITA.
Prej sot ky medium publik që funksionin me paratë e buxhetit të Kosovës, pra të taksapaguesve të Kosovës, prej sot ka pësuar një “kapje” të re, kësaj radhe mban llogon e Vetëvendosjes, shkruan Botapress.
