Shefi i Grupit Parlamentar të PDK-së, Abelard Tahiri ka thënë se dialogu ka sjellë rezultate pozitive në disa fusha, teksa shtoi se kur flitet për dialogun, po krijohet përshtypja që është vetëm një çështje e brendshme e Kosovës.
Ai në tryezën e ftuar nga KDI me temën “Kapitull i ri i dialogut Kosovë-Serbi”, ka thënë se dialogun si parti opozitare nuk e shohin si agjendë politike por si angazhim ditor politik.
“Kur flasim për dialogun na krijohet përshtypja se po flasim për një temë politike të brendshme sepse aq shumë kemi pasur përplasje si skenë politike saqë më shumë krijohet përshtypja që është agjendë politike dhe një iniciativë e jona si Kosovë. Me të drejtë kemi prit që ky do të jetë një fillim i ri. Z. Kurti i ka formuar tashmë institucionet të dala nga zgjedhjet e 14 shkurtit. Ne i kemi parë në vazhdimësi parimet e tij dhe kushtet e tij që i ka proklamuar si udhëheqës i opozitës për një periudhë të gjatë. Edhe vet si parti opozitare dialogun ne nuk duhet ta shohim si agjendë politike me të cilën do të akuzojmë njëra-tjetrën për koncesione të dëmshme, duhet ta shohim si një agjendë përtej angazhimit tonë ditor politik”, ka thënë ai.
Më tutje deputeti i PDK-së, tha se qeveria me kryeministrin Kurti është duke ia pamundësuar opozitës që të diskutojë rreth temave që do të duhej që të diskutoheshin në Bruksel.
“Një gjë të tillë fatkeqësisht po na e pamundëson Qeveria që po e drejton vendin dhe kryeministri Kurti me qasjen e tij. Pak para se të ndodh takimi në Bruksel, Kurti na e ka lexuar një raport se çfarë ka ndodhur në 10 vitet e fundit dhe pa thënë asgjë të re se çfarë do të jetë agjenda e Kosovës në dialog. Fatkeqësisht Qeveria jonë nuk ka një agjendë që do të mund të diskutohej mes partive në pushtet dhe partive opozitare. E shoh një qasje shumë të gabuar të qeverisë sonë”, u shpreh Tahiri.
Shefi i Grupit Parlamentar të PDK-së, më tej theksoi se qëllimi final i Kosovës në këtë proces nuk duhet të jetë njohja.
“Nuk besoj që qëllimi jonë final duhet të jetë njohja mes Kosovës dhe Serbisë, sepse edhe nëse kjo ndodh dhe prapë pengesën e kemi në Këshill të Sigurimit nga Kina dhe Rusia, atëherë Republika jonë nuk po arrin me përmbyll atë që është më e rëndësishmja, pra fuqizimi subjektivitetit tonë ndërkombëtar. Pa qenë pjesë e Kombeve të Bashkuara dhe pa e pas ulësen në OKB ne nuk e kemi përmbyll çështjen e fuqizimit të subjektivitetit tonë ndërkombëtar”, tha Tahiri. /Express/