Hetuesit belgë kontrolluan zyrat në Parlamentin Europian në Bruksel, në një hetim për ryshfet të supozuar nga Katari, mikpritës i Kupës së Botës. Ishte kontrolli i 20-të i kryer në Belgjikë që nga e premtja dhe presidentja e parlamentit, Roberta Metsola, paralajmëroi eurodeputetët se “demokracia është nën sulm”.
Policia belge ka arrestuar katër persona, mes tyre edhe zëvendëspresidentja e Parlamentit Europian Eva Kaili, një eurodeputete greke. Katari ka mohuar çdo keqbërje. Eurodeputetët do të debatojnë për skandalin të martën.
Prokurorët belgë thanë se rreth 600,000 euro u gjetën në shtëpinë e një të dyshuari, 150,000 euro në banesën e një eurodeputeti dhe disa qindra mijëra euro në një valixhe në një dhomë hoteli në Bruksel. Janë marrë edhe kompjuterë dhe celularë.
Që nga e premtja, burimet e IT-së të 10 punonjësve të parlamentit janë “ngrirë” për të parandaluar zhdukjen e të dhënave të nevojshme për hetimin. Katër të dyshuarit e arrestuar nga policia belge janë akuzuar për “pjesëmarrje në një organizatë kriminale, pastrim parash dhe korrupsion”, thanë prokurorët në një deklaratë të dielën.
Kaili, një eurodeputete për tetë vjet, u pezullua nga detyra e saj si një nga 14 nënkryetaret nga presidentja e parlamentit Metsola. Ajo është pezulluar gjithashtu nga Grupi i Socialistëve dhe Demokratëve në parlament dhe është përjashtuar nga partia e qendrës së majtë greke Pasok./Botapress.info/
