Një zjarr i madh ka shpërthyer sot në ndërtesën e Institutit Ushtarak Rus në qytetin Tver. Sipas agjencisë ruse TASS, përcjell Periskopi, një person ka humbur jetën dhe 20 të tjerë janë plagosur nga zjarri.
TASS shkruan se zjarri ka rënë për shkak të një mosfunksionimi në instalimet elektrike. Ky është një institut rus për zhvillimin e sistemeve të reja të mbrojtjes ajrore.
Zjarrfikësit kanë marrë njoftimin për zjarrin rreth orës 11 me orën lokale. 30 persona kanë kërkuar ndihmë mjekësore – disa për shkak të thithjes së tymit, të tjerë për shkak të lëndimeve të lehta.
Raportohet se disa persona janë plagosur duke u hedhur nga dritaret për t’iu ikur zjarrit.“Sipërfaqja e përgjithshme e prekur nga zjarri është rreth 1000 metra katrorë”, tha shërbimi rus i emergjencës.
Zjarri u përhap me shpejtësi në ndërtesë dhe përfshiu disa kate. Tymi i trashë u përhap edhe në qendër të Tverit.
