Kanë mbetur edhe pak ditë deri në ditën e zgjedhjeve lokale, atë të 17 tetorit.Por paraprakisht, kandidatët e shumtë për kryetar të komunave janë përkujdesur që secili nga ta të bëjë premtime nga më të voglat tek ato të mëdha për komunat të cilët synojnë.
Premtime të ndryshme u bën edhe në Prishtinë, Gjilan, Pejë, por duke mos lënë anash as qytetin e Ferizajt.
Është pikërisht kandidati i Lëvizjes Vetëvendosje, Valon Ramadani i cili së fundi pati një premtim “madhor” duke paralajmëruar organizimin e “Miss Gjyshes”.
Duke lënë anash problemet e shumta me të cilat përballen qytetarët e Ferizajt dhe nevojat të cilat kanë ata, i njëjti mendoi më tepër për organizim spektaklesh, ndër ta edhe atë të gjyshes.
Madje ai theksoi se do ta bëjë këtë në formë festivali, pasi “janë lënë anash gjyshet”.
Valon Ramadani paraqitjen e idesë apo premtimit për “Miss Gjyshja” e kishte bërë së fundi edhe para kryeministrit, Albin Kurti e i cili nuk hezitoi që ta duartrokiste.
“Krejt ata nipa e mbesa kanë me ardh edhe me duartrokit kur të zgjedhet Miss Gjyshja 1,2 dhe 3”, tha ai ndër të tjerash në kuadër të këtij premtimi.
Sipas Valon Ramadanit gjyshet janë lënë anash dhe se askush nuk po i përmend në programet e tyre as në fushatë e as jashtë tyre./Lajmi.net/
